Марат Әзілханов: Шеттегі қандастарға қазақ тілін үйрететін онлайн-сыныптар санын көбейту керек

НҰР-СҰЛТАН. ҚазАқпарат - Ақпарат және қоғамдық даму вице-министрі Марат Әзілханов «Отандастар Қоры» коммерциялық емес акционерлік қоғамының (КеАҚ) басшылық құрамымен кездесті, деп хабарлайды ҚазАқпарат ҚР Ақпарат және қоғамдық даму министрлігінің Telegram каналы тартқан ақпаратқа сілтеме жасап.

Кездесу барысында Қордың жұмысы, жекелеген салалардың ахуалы және биылғы жылдың жоспарлары туралы айтылды. Сондай-ақ, мәжіліске қатысушылар 5 мемлекетте (Ресей – Омск, Түркия – Стамбул, Германия – Берлин, Қырғызстан – Бішкек, Өзбекстан - Ташкент) ашылуы тиіс мәдени-іскерлік үйлері мен шетелдердегі қандастарға арналған қазақ тілін үйрену онлай-сыныптарын ашу жобаларын талқылады.

Қордың вице-президенті Мағауия Сарбасов шетелдердегі қандастар құрған қоғамдық ұйымдармен бірлесіп жұмыс істеуге арналған Меморандумдарға келісу ісі жалғасып жатқандығын жеткізді.

Бүгінде әлемнің 25 мемлекетінде 62 меморандумға қол қойылған. Сондай-ақ, М. Сарбасов әлемнің 12 елінде жалпы аудиториясы 800 адамды қамтитын 22 онлайн-сыныптың жұмыс істеп тұрғандығын айтты.

Өз кезегінде, Марат Әзілханов шет елдердегі мәдени-іскерлік үйлерді мазмұндық жағынан сапасын көтеру мен шет елдердегі қандастарды қазақ тіліне үйретуге арналған онлайн-сыныптар санын арттыруды тапсырды.