Марин Ле Пен Франция президенті қызметі үшін күресті жалғастыруға уәде берді

АСТАНА. KAZINFORM — Марин Ле Пен және Еуропарламенттің 8 депутатына сыбайлас жемқорлыққа қатысы бар деген айып тағылған атышулы сот үкімі шыққаннан кейін француз оппозициясының жетекшісі алдағы жоспарлары туралы түсінік берді, деп хабарлайды Kazinform тілшісі.

— Мен өзімді жоюға жол бермеймін, — деп мәлімдеді ашуланған Марин Ле Пен TF1 телеарнасына үкім шығарылғаннан кейінгі алғашқы сұхбатында.

Ол сондай-ақ «қандай жағдай болмасын» саясаттан кетпейтінін және сот оны ақша жымқырғаны үшін жаза ретінде бес жылға мемлекеттік қызметке қатысуға тыйым салған соң президенттік сайлауға түсу құқығы үшін күресуді жоспарлап отырғанын қосып өтті. 

— Ең маңыздысы, ол 2027 жылғы сайлауда Ұлттық бірлестік атынан президенттікке кандидат ретінде қатысу үшін жақын арада билікті өзінің 29 жастағы одақтасы Джордан Барделлаға беру мүмкіндігін азайтты, — деп жазды Politiсо газеті. 

Еске сала кетсек, 2024 жылдың қыркүйегінде француз оппозициясының жетекшісі Марин Ле Пенге қатысты сот процесі басталды. 

— Бүгін кешке миллиондаған француз адам құқықтарының елі Францияда судьялардың авторитарлық режимдердің прерогативі болып саналатын тәжірибелерді қолданып жатқанын көріп, елестету мүмкін емес дәрежеде ашуланды, — деп мәлімдеді Ле Пен.

Сот үкімінен кейін партия «демократияны құтқаруға» шақырған онлайн петиция жариялады.

Егер Ле Пен сайлауға түсе алмаса, Ұлттық бірлестіктің ең ықтимал резервтік кандидаты Барделла болуы мүмкін, ол әсіре оңшылдардың табысын пайдаланып, елдің ең жас президенті атанудың бірегей мүмкіндігіне ие болады.

Ле Пен ханым оның үкімін заң үстемдігін бұзатын «саяси шешім» деп сынағанымен, сауалнамаға қатысқандардың 54%-ы оның үкімін «Францияда салауатты демократия орнағанының» белгісі деп санайтынын, ал 65%-ы сот үкіміне «қанағаттанғанын» немесе «бей-жай қарамайтынын» айтқан.

Бұған дейін Франция соты «Ұлттық бірігу» партиясының жетекшісі Марин Ле Пенді Еуропалық Одақ қаражатын жымқырғаны үшін кінәлі деп тапты.