Мароккода Қазақстанның Құрметті консулдығы ашылды
АСТАНА. ҚазАқпарат - ҚР Сыртқы істер министрінің орынбасары Асқар Мусиновтың жұмыс сапары аясында Мароккода Касабланка қаласындағы Қазақстан Республикасының Құрметті консулдығының ашылу салтанаты өтті.
ҚР СІМ баспасөз қызметінен хабарлағандай, А. Мусинов қазақстандық-марокколық қарым-қатынас тарихындағы бұл оқиғаның маңызы мен Қазақстанның алдағы уақытта ынтымақтастықты дамытуға мүдделі екенін атап өтті. Ол құрметті консулдықтың қызметі екі мемлекет арасындағы сауда-экономикалық және мәдени-гуманитарлық байланыстың кеңеюіне ықпалдасатынына сенім білдірді.
Шара барысында консулдықта кітап және фото көрмесі ұйымдастырылды.
ҚР Құрметті консулы лауазымына Касабланканың беделді тұлғаларының бірі - Араб Магрибінің Экономикалық палатасының президенті, Марокко Парламентінің кеңесшілер Палатасының экс-депутаты Хассан Беркани тағайындалды.
