Машина жасау саласын дамыту бойынша ауқымды жоспарларымыз бар — Президент
АСТАНА. KAZINFORM — Елордада Қазақстан машина жасаушыларының XIІ форумы басталды. Форумның ашылуында Премьер-министр Олжас Бектенов Қазақстан Президенті Қасым-Жомарт Тоқаевтың құттықтау сөзін оқып берді.
— Сіздерді Қазақстан машина жасаушыларының XII форумының ашылуымен шын жүректен құттықтаймын. Бұл — машина жасау саласының білікті мамандарының кездесуі, отандық бизнес өкілдері үшін жаңа мүмкіндіктер алаңы. Қазір Қазақстандағы машина жасау саласының үлесі 13-тен 19 процентке дейін жетіп отыр, жалпы көлемі 4,1 миллионға жетті және экспорт көлемі де артып келеді. Қазір елімізге ауыл шаруашылығы техникасымен қамтамасыз ететін жаңа компаниялар келіп жатыр. Биыл машина жасау саласын дамыту бойынша ауқымды жоспарларымыз бар. Бұл біздің жемісті еңбегіміздің нәтижесі. Машина жасау көлемін арттыру, озық технологияларды, соның ішінде жасанды интеллектіні қолдану — біздің басты міндетіміз. Сондай-ақ жұмысшылар үшін қажетті еңбек жағдайларын жасау да аса маңызды. Қазіргі жаһандық өзгерістер мен дағдарыс жағдайларында жаңа мүмкіндіктер ашылып келеді. Машина жасау саласы Қазақстанның қарқынды дамуына өз үлесін қосуға дайын. Машина жасаушылар форумының табысты өтуіне тілектеспін, — деп жазылған Президент құттықтауында.
Айта кетейік, Қазақстан машина жасаушыларының XII форумы 24-25 сәуір күндері Астанада өтеді. Форум отандық машина жасау саласын одан әрі дамытуға бағытталған ұсыныстар мен практикалық ұсынымдар әзірлеуді көздейді.
Сондай-ақ, елордада машина жасау және металл өңдеу бойынша «Kazakhstan Machinery Fair 2024» халықаралық мамандандырылған көрмесі өтіп жатыр.
Бұған дейін отандық машина жасаушыларға шикізат құнын төмендету ұсынылған еді.
