Мәскеудегі алып көкеністер көрмесіндегі ең үлкен асқабақтың салмағы 817 кг болды

АСТАНА. KAZINFORM – Алып көкеністер көрмесінде салмағы 817 келі болатын рекордтық асқабақ өлшенді, деп хабарлайды РИА Новости.

Үлкен асқабақты өлшеу Мәскеу мемлекеттік университетінің «Аптекариялық бақ» ботаникалық бағының аумағында өтті. Бес алып асқабақтың бірі 817 келі салмақпен былтырғы 771 келі рекордты жаңартты. Көкеністің салмағы туралы ақпарат жаңа жетістікті ресми тіркеу үшін Ресей рекордтар кітабына ұсынылады.

Қалған алып асқабақтардың салмағы 301, 317, 508 және 771 келі болды.

14 қыркүйекте «Аптекариялық бақ» аумағында көкеністердің үлкен көрмесі ашылады. Онда рекорд орнатқан алып асқабақпен қатар алып пияз, қызылша, қияр және басқа да көкөністер бар.