Мәскеуге шұғыл қонған «Лондон-Нұр-Сұлтан» рейсінің жолаушылары сапарларын жалғастырды
НҰР-СҰЛТАН. ҚазАқпарат - 28 маусымда түнгі сағат бірге таяу Мәскеуге мәжбүрлі түрде қонған «Лондон-Нұр-Сұлтан» рейсінің жолаушылары аздаған кідірістен кейін елордаға ұшып шықты, деп хабарлайды ҚазАқпарат тілшісі.
Еске сала кетсек, бұған дейін «Эйр Астана» ұшағы мәскеулік Шереметьево әуежайына мәжбүрлі түрде қонғаны мәлім етілген болатын.
«28 маусымда «Эйр Астана» әуе компаниясының «Лондон-Нұр-Сұлтан» бағыты бойынша КС 942 рейсін орындаған ұшағы екі генератордың бірінің істен шығуы салдарынан жұмыс істемей тұрған ҚКБ (қосалқы күштік бекітпе) жағдайында Мәскеу уақытымен сағат 00:18-де шұғыл түрде қонды», - деп хабарланған болатын компанияның баспасөз қызметінен.
Бүгін әуе компаниясы аталмыш рейстің жолаушылары Нұр-Сұлтан қаласына ұшып шыққанын айтты.
«Бүгін түнде Шереметьеводағы әуежайға қонған Лондон-Нұр-Сұлтан рейсінің жолаушылары бүгін Алматы уақыты бойынша сағат 13:31 кезінде қосымша рейс арқылы ұшып шықты. Бортта 70 адам бар. 23 жолаушы аталмыш рейстен бұрын «Мәскеу-Алматы» рейсімен ұшып кетті», - деді «Эйср Астана» әуе компаниясының баспасөз қызметінен.
