Мәслихат депутаттарының сайлауы өтті
АСТАНА. ҚазАқпарат - Республиканың 14 өңірі бойынша 59 сайлау округінде мәслихаттардың шығып қалған депутаттарының орнына сайлау өтті. Бұл туралы бүгін ҚР Орталық сайлау комиссиясының баспасөз хатшысы Венера Жексембекова мәлім етті.
«Астана қалалық мәслихатының 1 депутаты, 7 облыстық депутат, 12 қалалық және 39 аудандық мәслихаттар депутаттары сайланды. Сайлау науқаны барысында 188 кандидат ұсынылды, олардың 61-ін саяси партиялар, 2-ін қоғамдық бірлестіктер ұсынды және 125-і өзін-өзі ұсынғандар. Округтік сайлау комиссиялары мәслихат депутаттығына кандидат ретінде 170 адамды тіркеді», - деп атап өтті В.Жексембекова.
Дауыс беру 392 сайлау учаскесінде өтті. Сайлаушылардың келуі алғашқы мәліметтерге сәйкес 74,4%-ды құрады.
Дауыс беру және дауыстарды санау рәсімі барысын байқауды 686 кандидаттардың сенім білдірген адамдары, саяси партиялардың, қоғамдық бірлестіктердің және БАҚ-тың өкілдері жүзеге асырды.
Сайланған мәслихат депутаттарының құрамында 44 (74,6%) ер адам, 15 (25,4%) әйел адам.
57 депутат - ҚР саяси партияларының мүшесі, 1-і партияда жоқ, тағы 1-і партияға мүшелігін көрсетпеген.
Олардың 56-сының (94,9%) жоғары,1-інің (1,7%) арнаулы орта және 2-інің (3,4%) орта білімдері бар.
