Майкл Джексон қайта жерленеді - New York Daily News басылымы
АСТАНА. Тамыздың 18-і. ҚазАқпарат -Поп-музыка королі Майкл Джексон тамыздың 29-ы күні - 51 жасқа толатын күні - Лос-Анжелестегі Forest Lawn зиратына жерленетін болады,
деп хабарлады дүйсенбі күні New York Daily News басылымы әртістің әкесі Джо Джексонға сілтеме жасап.
Майкл Джексон маусымның 25-інде ес-түзсіз жағдайда жеткізілген Лос-Анжелес ауруханасында көз жұмған болатын.
Әлемдік бұқаралық ақпарат құралдары атақты әншінің жерленгені туралы бірнеше рет жазды - соңғы рет мұндай ақпарат тамыздың 10-ында болып еді. Бірақ та, әншінің отбасы бұл фактіні әлі ресми қуаттаған жоқ.
New York Daily News басылымының жазуынша, әншінің жерленетіндігі туралы Джо Джексон Palms отелінде газеттің Лас-Вегастағы тілшісі Стив Фрайссқа берген сұхбатында айтқан.
Әншінің өлімінің ресми себебі әлі күнге дейін аталған жоқ. Оның жүрегі күшті әсер ететін дәрінің әсерінен тоқтап қалды деген пайымдау айтылуда.
