Мәжіліс ипотекалық кредит беру және инвесторлардың құқын қорғау мәселелеріне арналған заң жобасын екінші оқылымда мақұлдады
АСТАНА. 10 қараша. ҚазАқпарат /Қанат Мәметқазыұлы/ - Бүгін ҚР Парламенті Мәжілісінің жалпы отырысында палата депутаттары «ҚР кейбір заңнамалық актілеріне ипотекалық кредит беру және қаржылық қызметтерді тұтынушылар мен инвесторлардың құқықтарын қорғау мәселелері бойынша өзгерістер мен толықтырулар енгізу туралы» заң жобасын екінші оқылымда мақұлдады.
Құжат қаржылық қызметтерді тұтынушылардың құқықтарын қорғау жүйесі мен ипотекалық кредит беру мәселелері бойынша азаматтардың әлеуметтік кепілдіктерін қорғау тетіктерін жетілдіруге бағытталған. Сонымен бірге, заң жобасы бойынша акционерлік қоғамдардың лауазымды тұлғаларының жауаптылығын олардың қабылданатын шешімдер үшін дербес жауапкершілігін анықтау арқылы күшейту шаралары көзделеді.
Бұдан бөлек, заң жобасы ипотекалық заемшыларды қорғауды күшейте түседі. Атап айтқанда, соттың шешімінсіз ипотекалық кредит бойынша кепілде тұрған мүлікті, кепіл иесінің тиісті жазбаша түрде берілген келісімі болмаса заңды тұлғаның оларды пайдалануы үшін тыйым салу нормалары қарастырылып отыр. Сондай-ақ, кепіл ұстаушыға кепіл мүлкіне қатысты оны сату қажеттігі туындаған жағдайда тәуелсіз бағалау жүргізуді міндеттеу көзделеді. Құжатта жалпылама қаржылық қызметтерді тұтынушылардың құқықтарын қорғау шаралары да қамтамасыз етіледі. Атап айтқанда, банктік заемдар келісімшарты бойынша заңда қарастырылған жағдайдан басқа жағдайларда шарттарды біржақты өзгертуге тыйым салынады.
