Мәжіліс міндетті және өзара сақтандыру мәселелері жөніндегі заң жобасы бойынша келісім комиссиясының ұсыныстарын қабылдады

АСТАНА. Желтоқсанның 23-і. ҚазАқпарат /Қанат Мәметқазыұлы/ - Бүгін ҚР Парламенті Мәжілісінің жалпы отырысында палата депутаттары «Қазақстан Республикасының кейбір заңнамалық актілеріне міндетті және өзара сақтандыру, салық салу мәселелері бойынша өзгерістер мен толықтырулар енгізу туралы» заң жобасы бойынша қос палата арасында келіспеушіліктерді еңсеру жөніндегі келісім комиссиясының ұсыныстарын талқылады. Нәижесінде палата депутаттары комиссия ұсыныстарын қолдап, құжатты қабылдады,

деп хабарлайды ҚазАқпарат.

Естеріңізге сала кетейік, бұл заң жобасының мақсаты сақтандырудың міндетті түрлерін қарастыратын заңнамалық актілердің жекелеген ережелерін нақтылау мен реттеуге бағытталады. Бұдан басқа құжатпен өзара сақтандыру қоғамдарын дамытуды одан әрі ынталандыру, сақтандыру қызметтерін тұтынушылардың мүліктік және әлеуметтік мүдделерінің құқықтық қорғалуын қамтамасыз ету, сондай-ақ салық әкімшілігін жүргізуді жетілдіру шаралары көзделеді. Атап айтқанда, қызметкерлердің өмірі мен денсаулығына келтірген зиян үшін жұмыс берушінің азаматтық-құқықтық жауапкершілігін міндетті сақтандыру жөніндегі функцияны өмірді сақтандыру жөніндегі сақтандыру ұйымдарына беру көзделеді.

Қос палата арасындағы келісім комиссиясы 56 ұстаным бойынша келіспеушіліктерді қарап шықты. Комиссия шешімі бойынша бұның 3-еуі Мәжілістің редакциясында, 9-ы Сенаттың, ал қалған ұстанымдар бірлескен редакцияда қабылданды.