Мәжіліс вице-спикердің өкілеттілігін мерзімінен бұрын тоқтатты
АСТАНА. 5 қыркүйек. ҚазАқпарат - Бүгін ҚР Парламенті Мәжілісінің жалпы отырысында палата депутаттары Бақтықожа Ізмұхамбетовтың өкілеттігін мерзімінен бұрын тоқтату туралы қаулы қабылдады.
Естеріңізге сала кетейік, Б. Ізмұхамбетов ағымдағы жылдың 15 тамызындағы ҚР Президенті Жарлығына сәйкес, Атырау облысының әкімі қызметіне тағайындалған болатын.
«ҚР Конституциясының 52 бабы, 2, 3 және 8-і тармағына және «Парламент және оның депутаттары туралы» Конституциялық заңның 24-бабына сәйкес, Орталық сайлау комиссиясы депутаттың өкілеттігін мерзімінен бұрын тоқтату туралы мәселені шешу үшін ұсыным жасайды. Б. Ізмұхамбетов 15 тамыздағы Президент Жарлығына сәйкес, Атырау облысының әкімі қызметіне тағайындалған болатын», - деді жалпы отырыста баяндаған Орталық сайлау комиссиясының мүшесі Ләззат Сүлеймен.
Осыған орай, палата депутаттары ОСК қаулысын мақұлдап, өкілеттікті мерзімінен бұрын тоқтатты.
