Мәжілісте өңдеуші өнеркәсіпті дамытуға бағытталған жаңа заң жобасы таныстырылды
НҰР-СҰЛТАН. ҚазАқпарат – Бүгін Мәжілісте өткен дөңгелек үстел барысында «Өнеркәсіптік саясат туралы» заң жобасы талқыланды, деп хабарлайды ҚазАқпарат тілшісі.
«Өнеркәсіптік саясат туралы» заң жобасының басты міндеті – өңдеуші өнеркәсіпті дамытудың негізгі қағидасын, мақсат-міндеттерін айқындау. Мақсаты – бәсекеге қабілетті, жоғары технологиялы, экспортқа бағдарланған өнім өндірісін ұлғайту, сондай-ақ дамудың шикізаттық моделінен алшақтап, өңдеуші өнеркәсіпті тұрақты дамыту. Үкіметтік редакцияда заң жобасы бес бөлімнен құралған», - деді заң жобасын депутаттарға таныстырған ҚР Индустрия және инфрақұрылымдық даму вице-министрі Аманияз Ержанов
Оның атап өтуінше, алғашқы бөлім «Жалпы ережелерді» қамтиды. Онда: ұғымдық аппарат; өнеркәсіптік саясаттың мақсаты, міндеті мен қағидалары; елдің индустриялық дамуын бағалау қарастырылады. 2-бөлім - «Өнеркәсіпті дамытудың базалық шарттары». Онда өнеркәсіп саясаты мәселелері жөніндегі ведомствоаралық комиссия; өнеркәсіпті дамыту қоры, сондай-ақ, өнеркәсіпті мемлекеттік ынталандырудың нормалары реттелген.
«Өткізу нарықтарында ілгерілету» деп аталатын З-бөлім отандық өнеркәсіптік кәсіпорындарды шетелде, әрі, сыртқы және ішкі нарықтарда қолдау, ілгерілетуге бағытталған. Қосылған құнның жаһандық тізбекке енуіне жәрдемдесуді көздейді. Осылайша, ұлттық экономиканың өз-өзін дербес қамтамасыз етуіне арналған. 4-бөлім -өнеркәсіптік құрастыру туралы келісімдерді реттеу, өнеркәсіптегі ғылыми және ғылыми-техникалық қызмет нәтижелерін коммерцияландыру үшін жағдай жасау, сондай-ақ еңбек өнімділігін арттыру арқылы «Өнеркәсіптің тиімділігі мен бәсекеге қабілеттілігін арттыру». 5-бөлім - «Қорытынды ережелер», - деді вице-министр.
