Мәжілістің бюро отырысында қандай заң жобалары талқыға түседі

НҰР-СҰЛТАН. ҚазАқпарат - Бүгін Мәжіліс спикері Ерлан Қошановтың төрағалығымен Бюро отырысы өтіп, онда алдағы жалпы отырыстың күн тәртібі жобасы нақтыланды, деп хабарлайды ҚазАқпарат.

Бюро отырысында депутаттар қарауына Қазақстан мен Түркі академиясы арасындағы Түркі академиясын орналастыру шарттары мен тәртібі туралы келісімді ратификациялау туралы заң жобасы ұсынылды.

Құжатқа 2020 жылғы 16 қарашада Түркітілдес мемлекеттер кеңесіне қатысушы мемлекеттермен ынтымақтастықты одан әрі нығайту мақсатында қол қойылды және ұйымның Қазақстандағы қызметі кезеңінде мәртебесі мен артықшылықтары айқындалды.

Сонымен қатар Мәжіліс депутаттары екінші оқылымда «Қазақстан Республикасының биологиялық қауіпсіздігі туралы» заң жобасын ілеспе түзетулермен талқылайды.

Палатаның алдағы жалпы отырысында депутаттар өздері әзірлеген «Қазақстан Республикасының кейбір заңнамалық актілеріне отбасы институтын нығайту мәселелері бойынша өзгерістер мен толықтырулар енгізу туралы» заң жобасын жұмысқа алады.

Аталған құжат мемлекеттік отбасылық саясатты қалыптастыру бөлігіндегі түзетулермен қатар тұрмыстық зорлық-зомбылықтың жалпы және жеке алдын алу шараларын көздейтін нормаларды қамтиды.