Мәжіліс экспорттық-кредиттік агенттіктің арнайы мәртебесін құруға бағытталған заңды қабылдады
Бүгін Мәжілістің жалпы отырысында «Қазақстан Республикасының кейбір заңнамалық актілеріне экспорттық-кредиттік агенттік және шикізаттық емес тауарлардың экспортын ілгерілету мәселелері бойынша өзгерістер мен толықтырулар енгізу туралы» заң жобасы екінші оқылымда қаралды. Талқылау барысында палата депутаттары заңды қабылдады, деп хабарлайды Kazinform.
Осы құжат 2023 жылғы 13 қыркүйекте Мәжілісте бірінші оқылымда мақұлданған еді.
Құжат экспортты қаржылық қолдаудың бірыңғай операторы «KazakhExport» экспорттық сақтандыру компаниясы» АҚ үшін реттеушілік режимді қалыптастыру бөлігінде Мемлекет басшысының тапсырмасын орындау мақсатында әзірленді. Заң экспорттық-кредиттік агенттіктің арнайы құқықтық мәртебесін құруға бағытталған, ол шикізаттық емес экспортты қаржылық қолдау мен дамытудың негізгі шараларын біріктіруге мүмкіндік береді.
Заң жобасымен жұмыс барысында депутаттар:
- сауда қызметін реттеу саласындағы уәкілетті органның құзыретін нақтылауға;
- «Қазақстанның экспорттық-кредиттік агенттігі» ұғымын нақтылауға бағытталған негізгі түзетулерді енгізді.
Бұдан басқа, депутаттар жекелеген нормаларды нақтылайтын және заң жобасының мазмұнын жақсартатын түзетулер енгізді.
