Медициналық ұйымдарда тегін дәрілердің бар-жоғын қалай білуге болады
АСТАНА. ҚазАқпарат - Диспансерлік пациенттер тегін берілетін дәрі-дәрмектердің дәріханаларда бар-жоғын, олардың қашан жеткізілетінін, мемлекеттік сатып алудың жүргізілгенін, не жүргізілмегенін ендігіде онлайн режімде көріп отыра алады, деп хабарлайды ҚазАқпарат ҚР Денсаулық сақтау министрлігіне сілтеме жасап.
Мәлім етілгендей, онлайн режімдегі ақпаратты Бірыңғай дистрибьютор сайтының «2018 жылға АДҚ бойынша ақпарат» бөлімінен мына сілтеме бойынша: https://www.sk-pharmacy.kz/rus/press-centr/zakup_ls_i_imn_na_2018_god_rus/ табуға болады.
«СҚ-Фармация» сайтының арнайы құрылған бөлімінде пациенттер бірыңғай дистрибуция жүйесі арқылы дәрі-дәрмекті сатып алу жағдайы туралы және дәрі-дәрмекті тегін рецепт бойынша босататын дәріхана ұйымдарында оның бар-жоғына қатысты барлық ақпартты таба алады.
«Науқастар үшін өздерінің аймағында қажетті дәрі-дәрмектердің бар-жоғын және оның дәріханаға келген-келмегенін білу қаншалықты маңызды екенін түсінеміз. Сондықтан, бұл деректерді ашық жариялау туралы шешім қабылданды», - дейді Бірыңғай дистрибьютордың Басқарма төрағасының міндетін атқарушы Шария Исмуханова.
Сонымен қатар көрсетілген шұғыл байланыс телефондарына қоңырау шалу арқылы қажетті препараттың белгілі бір өңірге қашан жөнелтілетіні туралы ақпаратты алуға болады.
