Медведев: Обамамен келіссөздер қауырт, іскер және шынайы болды

МӘСКЕУ. Шілденің 7-сі. ҚазАқпарат - Ресей Президенті Дмитрий Медведев АҚШ Президенті Барак Обамамен Мәскеуде өткен келіссөздердің алғашқы раундын пайдалы, іскер, ашық және шынайы деп атады,

деп хабарлайды ҚазАқпарат ресейлік «Жаңалықтар» агенттігіне сілтеме жасап.

«АҚШ Президенті Барак Обаманың Ресейге алғашқы сапары өте қауырт болды: алғашқы күннің қорытындысында  барлық бағыттар бойынша біздің елдеріміздің келешегі, әлемдік дамудың преспективалары үшін маңызды мәселелер қаралды», - деді Ресей басшысы.

 «Бұл өте маңызды, өйткені соңғы жылдарда көптеген мәселелер қордаланып қалған болатын. Дегенмен бізде оларды шешуге деген өзара ұмтылыс болды, проблемалар іскерлік жағдайда талқыланды», - деді Медведев.

Ресей мен АҚШ Президенттері жоғары дәрежедегі стратегиялық шабуыл құралдары бойынша негіздемелік құжатқа қол қойды. Бұл құжат бойынша Ресей мен АҚШ ядролық оқтұмсықтар санын екі есеге жуық - 1500-1675 бірлікке дейін және оларды тасымалдағыштарды 500-1100 бірлікке дейін қысқартпақ.