Мексикада төрт журналист із-түзсіз жоғалып кетті
АСТАНА. Шілденің 28-і. ҚазАқпарат - Мексикада шілденің 26-сында Лагуна өңірінде із-түзсіз жоғалып кеткен төрт журналисті іздеу шаралары басталды. Адам құқықтары жөніндегі ұлттық комиссия ел үкіметінен көмек сұрап, өтініш жасады.
Комиссия өз хатында «өз жұмыстарын атқару барысында журналистердің жиі шабуылға ұшырай бастағанын, себебі оларға жасалған шабуылдар жеткілікті тексерілмей отырғанын», - баса атап көрсетті, деп хабарлайды РБК агенттігі.
Жоғалғандардың ішінде - екі оператор, Multimedios television тележелісінің тілшісі және El Vespertino газетінің репортері бар. Олардың барлығы жолда көлік тоқтатып тұрған кезде шабуылға ұшыраған. Бұл - есірткі картельдері жиі жасайтын әрекет.
Жылдың басынан бері Мексикада жеті журналист өлтірілді. Көптеген БАҚ қызметкерлері есірткі картельдерінің тарапынан қоқан-лоқы естіп жатады.
