Мектеп оқушылары Қазақстан тарихын енді ҚР Ұлттық музейінде оқи алады
НҰР-СҰЛТАН. ҚазАқпарат - Мектеп оқушылары Қазақстан тарихын енді ҚР Ұлттық музейінде оқи алады. Бүгін Мәдениет және спорт министрі Дәурен Абаев «Музейдегі оқу күні» атты жаңа мәдени-білім беру жобасының басталғаны туралы хабарлады.
Сабақтың тақырыбы мен мазмұны оқу бағдарламасына толық сәйкес келеді, деп хабарлайды ҚазАқпарат ҚР Мәдениет және спорт министрлігінің баспасөз қызметіне сілтеме жасап.
Жоба 5-9 сынып оқушыларының қоғамдық-гуманитарлық пәндер бойынша теориялық білімдерін бекітуге бағытталған.
«Балалар төл тарихымызды музей экспонаттарының көмегімен зерттейтін болады, бұл балалар үшін де, педагогтер үшін де тамаша мүмкіндік. Зерттеуші ғалымдар, ҚР Ұлттық музейінің экскурсия жетекшілері орта мектептің тарих пәнінің мұғалімдерімен бірлесіп, геймификация элементтерін қолдана отырып, интерактивті сабақтар өткізеді. Сабақ барысында оқушылар экспонаттармен жақынырақ танысып, артефактілердің көшірмелерін қолда ұстай алады», - деп атап өтті ҚР Мәдениет және спорт министрі Дәурен Абаев.
Сабақтар музейдің экспозиция залдарында өтеді. Бір дәрістің ұзақтығы 35-45 минутты құрайды. Еліміздің басқа қалаларының оқушылары үшін музей сабақтары жақын арада онлайн форматта қолжетімді болады. Ол үшін музей қызметкерлері видео сабақтар дайындаған.
Айта кетейік, жоба «Балалар жылы» аясында жүзеге асып отыр.
