Мемлекет тегін вакцина алуға мүмкіндік жасап отыр – Алексей Цой
НҰР-СҰЛТАН. ҚазАқпарат – Коронавирустан ПТР тест емес, вакцина қорғайды. Бұл туралы ҚР Денсаулық сақтау министрі Алексей Цой айтты, деп хабарлайды ҚазАқпарат тілшісі.
«Мемлекет қаржысы есебінен вакцинация шығыны өтеледі. Тегін вакцина алыңыздар. Ең бастысы, ПТР тест сіздерді коронавирус инфекциясынан қорғай алмайды. Ал вакцина – қорғайды. Сондықтан ауырғыңыз келмесе, қорғаныста болуды қаласаңыз, онда сізге мемлекет тегін вакцина алуға мүмкіндік жасап отыр. Егер, азаматтар түрлі себептермен вакцина алғысы келмесе, онда (ПТР тест тапсыруға) ақша төлеуге тура келеді», - деді Денсаулық сақтау министрі Орталық коммуникациялар қызметіндегі брифинг барысында БАҚ өкілдерінің сауалына орай.
Айта кетейік, елімізде КВИ-ға қарсы вакцина алудан бас тартатын қызмет көрсету саласының, өнеркәсіп кәсіпорындарының және өзге де ұйымдасқан ұжымдардың қызметкерлері үшін міндетті ПТР-тестілеу талабы енгізіледі. Тестіні әр 7 күн сайын өтіп тұру қажет.
