Мемлекеттік комиссия 2008-2010 жылдарға арналған Мемлекеттік бағдарламаның санаттары бойынша тұрғын үй бөлу квоталарын белгіледі

АСТАНА.  Шілденің  2-сі. ҚазАқпарат /Дамир  Байманов/ -  Қазақстан Республикасындағы Тұрғын үй құрылысының 2008-2010 жылдарға арналған мемлекеттік бағдарламасын жүзеге асыру жөніндегі тұрғын үй комиссиясының бірінші отырысында әр санат  бойынша,  Астанада салынып жатқан   пәтерлерді  бөлу квоталары    белгіленді,

 деп хабарлайды  ҚазАқпарат тілшісі әкімдіктің  баспасөз қызметіне  сілтеме жасап.

«Жас отбасы» санаты   үшін   бір бөлмелі 449   пәтер,   екі бөлмелі 536 пәтер,   үш бөлмелі 101 пәтер бөлінуде. Ал  «Мемлекеттік органдардың қызметкерлері» санатына  бөлінетін пәтерлер саны: 1 бөлмелі пәтер - 1200, 2 бөлмелі пәтер - 600, 3 бөлмелі пәтер - 271.

«Мемлекеттік мекемелердің қызметкерлері»  санаты  бойынша  бөлінетін пәтерлер санына келер болсақ, 1 бөлмелі пәтер - 815, 2 бөлмелі пәтер - 363, 3 бөлмелі пәтер - 135  болады.

Бір бөлмелі 710 пәтер,  екі бөлмелі  315 пәтер  және  үш бөлмелі 117 пәтер   мемлекеттік кәсіпорындардың  қызметкерлеріне  бұйырады.

Комиссия мүшелері келесі отырыстарда Мемлекеттік бағдарламаға «Жас отбасы» категориясы бойынша қатысқандардың жинаған балдарын есептейді. Олардың тізімдері, жиналған балдарымен қоса, Астана қаласы әкімдігінің сайтында жарық көреді.