Мерекелік демалыста ҚТЖ пойыздары 860 мыңнан астам жолаушыны тасымалдаған
АСТАНА. KAZINFORM – Наурыз айындағы мерекелік демалыста «Жолаушылар тасымалы» АҚ пойыздары арқылы 860 мыңнан астам жолаушы қатынаған. Бұл туралы «Жолаушылар тасымалы» АҚ баспасөз қызметі мәлім етті.
Тасымал компаниясының мәліметінше, мереке күндері жолаушылар арасында Астана-Алматы, Астана-Шымкент, Шымкент — Ақтөбе және Павлодар — Астана бағытындағы пойыздарға сұраныс жоғары болған. 7, 9, 21 және 23 наурыз күндері аралығында жолаушылардың қарасы көп болған.
«Мереке күндері тасымалға сұраныстың жоғарлауына байланысты «Жолаушылар тасымалы» АҚ қосымша 3 пойыз және вагондар тіркеу есебінен жолаушыларға 30 мыңнан астам қосымша орын ұсынды. Сонымен қатар, қала маңындағы бағыттарға электрпойыздардың 4 рейсі қосылып, пойыздардың құрамы ұлғайтылды» — делінген хабарламада.
Айта кетейік, жыл сайын ұлттық тасымалдаушының пойыздарын 13 миллионнан астам жолаушы пайдаланады.
