Мессидің адвокаттары салықтан жалтарды деп шығарылған үкімге шағым түсіретіндерін мәлімдеді

АСТАНА. ҚазАқпарат - Лионель Месси адвокаттары «Барселона» шабуылшысын салықтан жалтарды деп айыптап, 21 ай түрмеге жабу туралы испаниялық сот үкіміне шағым түсіретіндерін мәлімдеді, деп хабарлайды Би-би-си.

Сәрсенбі күні сот футболшыны 21 айға бас бостандығынан айыру туралы үкім шығарды. Мессидің әкесіне де осындай үкім кесілген.  Одан бөлек, футболшы 2 миллион еуро (2,2 миллион доллар), ал оның әкесі 1,5 миллион еуро көлемінде айыппұл төлеуі тиіс.

Отырыс барысында сот футболшының Danone, Adidas, Pepsi-Cola және басқа да компаниялармен жасасқан жарнамалық келісімшарттарын қарап шықты.

Прокуратураның айтуынша, футболшы мен оның әкесі 4,1 млн. еуро көлеміндегі қаражатқа салық төлемеген. Салық төлемеу үшін олар офшор схемасын пайдаланған.