Михаил Кукушкин Испанияда негізгі турнирге жолдама алды

АСТАНА. KAZINFORM — Қазақстандық, әлемнің 165-ракеткасы Михаил Кукушкин Тенерифе (Испания) челленджер турниріне жолдама алды.

Іріктеу сайыстарының 1-ракеткасы болып тіркелген қазақстандық теннисші алдымен грузиялық Николоз Басилашвилиді 6:2, 6:2 есебімен жолдан тайдырды.

М.Кукушкин іріктеу сайыстарының финалында рейтингте 320-орындағы франциялық Лорен Локолимен кортқа шықты.

Бірінші партияда қазақстандық теннисші 4:1 есебімен алға кеткен сәтте Л.Локоли матчты жалғастырудан бас тартты.

Осылайша, М.Кукушкин негізгі турнирге өтті.

Тағы бір қазақстандық Тимофей Скатов іріктеу сайыстарының жартылай финалында италиялық Сальваторе Карузоға 4:6, 1:6 есебімен жол беріп, жарыстан шығып қалды. 

Еске сала кетейік, бұдан бұрын Әмір Омархановтың жасөспірімдер арасында әлемдік рейтингіде 12-орынға көтерілгенін жазған болатынбыз.