Миллион оқырманы бар қытайлық экс-шенеунік істі болды
АСТАНА. KAZINFORM – 2013-2016 жылдар аралығында қазақ облысын басқарған қытайлық жоғары лауазымды экс-шенеунік тергеуге алынды. Ол кезінде миллионнан астам оқырманы бар интернет-блогер ретінде танымал болған еді.
Қытайлық БАҚ-тың жарыса жазуынша, ҚКП Шыңжаң ұйғыр автономиялық региондық Тәртіптік тексеріс комиссиясы 2 сәуір күні ШҰАР Халық үкіметі партиялық басшылық тобының бұрынғы мүшесі Хуан Саньпиньнің үстінен заң мен тәртіпті өрескел бұзғаны үшін тәртіптік іс қозғалғанын хабарлады.
Ашық дереккөзден белгілі болғандай, 68 жастағы Хуан Саньпинь ұзақ жылдар бойы Шыңжаңда басшылық қызмет атқарып, бұрын-соңды Бұратала моңғол автономиялық облысы әкімінің орынбасары, Құмыл аймақтық партия комитеті хатшысының орынбасары, Қашқар аймақтық партия комитеті хатшысының бірінші орынбасары, Ақсу аймақтық партия комитетінің хатшысы, Іле Қазақ автономиялық облыстық партия комитетінің хатшысы болған. 2016 жылдың желтоқсан айында Шыңжаң Халық үкіметі партиялық басшылық тобының мүшесі болып тағайындалып, кейінірек жергілікті Халық өкілдері жиналысының тұрақты комитетіне жылыстатылған.
Хуан Саньпинь зейнетке шыққаннан кейін де қоғамдық іс-шараларға жиі қатысып отырған. 2023 жылдың сәуірінде ол Шыңжаң қарттар ісін дамыту қорының төрағасы болып сайланған.
Саяси сараптамаларымен танымал guancha.cn сайтының жазуынша, Қытай шенеуніктерінің көпшілігі жұрт назарына ілінуден бойын аулақ ұстайтыны белгілі, бірақ, Хуан Саньпинь, керісінше, әлеуметтік желідегі белсенділігімен көзге түскен, оның оқырмандарының ұзын саны миллионнан асқан болатын.
Ақсу аймақтық партия комитетінің хатшысы қызметін атқара жүріп, ол Weibo платформасында өз атымен аккаунт ашады. Іле облысына бірінші басшы болып барғаннан кейін де әлеуметтік желіден қол үзбей, бес-алты жылдың ішінде 40 мыңнан астам жазба жариялайды. Кезінде қытайлық әлеуметтік желінің көшін бастап, кейінірек жабылып қалған Tencent Weibo платформасында оның 1,04 миллион оқырманы болған, ал қазіргі күнде Sina Weibo-да әлі де 420 мыңнан астам оқырманы бар.
Айта кетерлігі, өткен жылы қызметінен босатылып, қылмыстық жауапқа тартылған вице-министр деңгейіндегі екі бірдей экс-шенеунік – Доу Ваньгуй мен Ян Фасэнь өз кезінде Хуан Саньпиньнің қол астында қызмет атқарған болатын.
ШҰАР Саяси-консультативтік кеңесі төрағасының бұрынғы орынбасары Доу Ваньгуй өткен жылдың наурызында істі болды. Оған «саяси алаяқтармен байланысқан, симониямен айналысқан және ірі көлемде пара алған» деген айып тағылды.
Ал өткен жылдың қазан айында Цинхай провинциясы партия комитетінің тұрақты мүшесі Ян Фасэнь тәртіптік тексеріс органына өз еркімен беріледі. Ол «араны шектен тыс ашылып, билікті пайдакүнемдік мақсатта асыра пайдаланған» деп айыпталды.
Бұдан бөлек, Хуан Саньпиньнен кейін Іле қазақ автономиялы облыстық партия комитетінің хатшысы болып тағайындалған Цзэн Цун бір жылға жетер-жетпес уақытта қызметінен босатылған. Кейінірек оның 900 мың юань пара алғаны белгілі болады.
