Мысырда 3600 жыл бұрын билік құрған патшаның қабірі табылды
АСТАНА. KAZINFORM — Филадельфиядағы Пенсильвания университетінің Египет-Америка археологиялық миссиясы Египеттің оңтүстігіндегі Абидос аймағында 3600 жыл бұрын билік құрған белгісіз патшаның қабірін тапты. Бұл туралы Artnet хабарлады.
Қабірдің тереңдігі жеті метрдей және саз кірпіштен салынған күмбезді әктас жерлеу бөлмесі бар. Кіреберістің екі жағында египеттік Исида Нефтьида құдайларының есімдері сақталған. Олар жиі бірге бейнеленген, өйткені Исида тууды, ал Нефтьида өлімді бейнелеген.
Зерттеушілердің айтуынша, Абидос әулеті біздің дәуірімізге дейінгі 1630-1539 жылдар аралығында өмір сүрген. Ол кезде Египеттің солтүстік бөлігін гиксолар, оңтүстік бөлігін бірнеше жергілікті патшалар биледі.
Қабірден табылған патшаның аты-жөні белгісіз. Археологтар оның есімі кіреберістегі кірпіштерге жазылған деп есептейді, бірақ иероглифтер оқылмайды, өйткені оларды қабір тонаушылар бүлдірген.
Мысырдың Ежелгі ескерткіштер жоғарғы кеңесінің бас хатшысы Мохамед Исмаил Халедтің айтуынша, бұл жаңалық Анубис тауындағы көне зираттардағы патша қабірлерінің дамуы туралы жаңа ғылыми дәлелдер ұсынады. Сондай-ақ Абидос әулетінің ең аз зерттелген билеушілері туралы қосымша мәліметтер береді.
Кезінде археологтар бұл әулеттің бар екеніне де күмән келтірген. Алайда Абидос билеушілерінің бірі Сенебкайдың бейіті табылғаннан кейін жағдай өзгерді.
Археологтар аймақты зерттеуді жалғастырып жатыр. Олар бұл жерден сол дәуірге жататын басқа патшалардың бейіттерін тауып, сол арқылы жаңадан табылған бейіт иесінің кім екенін анықтауға болады деп болжайды.
Еске сала кетейік, Мысырда II Тутмостың қабірі анықталды.
