Мысырда екі жолаушы пойызы соқтығысты: 3 адам қаза тауып, 49 адам жарақат алды

АСТАНА. KAZINFORM – Мысырдың Шаркия провинциясында екі пойыздың соқтығысуы салдарынан үш адам қаза тауып, тағы 49 адам жарақат алды, деп хабарлайды Синьхуа ақпарат агенттігі.

Оқиға орнына 39 жедел жәрдем көлігі жіберілді. 

Мысыр Денсаулық сақтау министрлігі мәлімдеме жасап, жарақат алған 44 адамның денсаулық жағдайы қалыпты екенін айтты. Жақында олар ауруханадан шығарылады. Тағы бес адам қосымша бақылауды қажет етеді.

Шаркия губернаторы Хазем әл-Ашмунидің хабарлауынша, барлық жолаушылар екі пойыздан эвакуацияланған және теміржол желісіндегі пойыздар қызметін қалпына келтіруге күш салынып жатыр.  

Мысырдың Ұлттық теміржол басқармасының атап өтуінше, апаттың техникалық себептерін анықтау үшін теміржол мамандары жұмылдырылған комитет құрылған. 

Бұған дейін Ресейдің Волгоград облысында жолаушылар пойызының сегіз вагоны рельстен шығып кеткені туралы жазған болатынбыз. Адамдар зардап шекті.

Бельгияда да теміржол апаты болды. TGV жүрдек пойызы жоғары жылдамдықпен трактор тіркемесін соқты. Пойыздың екі жолаушысы ауыр жарақат алды. Фермер аман қалды. 

Ақпаратты Kazinform агенттігі үшін Синьхуа серіктес агенттігі арнайы ұсынды.