Молдованың ОСК референдумның соңғы қорытындысын бекітті

АСТАНА. KAZINFORM – Молдованың Орталық сайлау комиссиясы (ОСК) 20 қазанда өткен ЕО-ға қосылу туралы референдумның қорытындысын мақұлдады. Онда пікір айырмашылығы еуроинтеграцияны жақтаушылар пайдасына 0,7 пайыз болған. Бұл туралы шешім ведомствоның баспасөз қызметі таратқан жұма күні өткен жиында қабылданды, деп хабарлайды ТАСС ақпарат агенттігі. 

«Конституциялық референдумға сайлаушылардың қатысуы қажетті шарттарға сәйкес болды. Оны 749 719 сайлаушы жақтап, 739 155-і қарсы дауыс берді. Барлығы 1 488 874 бюллетень жарамды деп танылды», - деп оқыды қаулы жобасын ОСК төрайымы Анджелика Караман.

Ол бірауыздан қабылданды. Соңғы мәліметке сәйкес, сайлауға қатысу 50,72 пайыз. 50,35% жақтап, 49,65% қарсы дауыс берді. Дауыстарды санау хаттамасы, сондай-ақ референдумды ұйымдастыру мен өткізу туралы ОСК есебі Конституциялық Сотқа бекітуге жіберіледі.

Референдум Молдовадағы президент сайлауымен қатар өтті. Мoldova-news.com атап өткендей, барлық хаттамаларды өңдеу нәтижелері бойынша қазіргі президент Майя Санду 42,45%, бұрынғы бас прокурор Александр Стояногло 25,98% дауыс жинады. Олар 3 қарашада өтетін екінші турға өтті.