Мойынқұмда заңсыз аң аулаған 9 адам ұсталып, 8 қару тәркіленді
ТАРАЗ. ҚазАқпарат - Жамбыл облысы, Мойынқұм ауданында заңсыз аң аулаған 9 адам ұсталып, 8 қару тәркіленді, деп хабарлайды ҚазАқпарат.
Бұл азаматтарды облыстық табиғи ресурстар және табиғат пайдалануды реттеу басқармасы жанынан құрылған «Жануарлар әлемін қорғау бойынша мамандандырылған жедел қызмет» мамандары анықтаған.
Мойынқұм ауданындағы «Андасай» қорығына жасалған рейдтік іс-шара барысында 6 құқық бұзушылық анықталып, ұсталған 9 адамнан 8 қару тәркіленген.
«Браконьерлікпен айналысқан азаматтар бойынша барлық мәліметтер аудандық ішкі істер бөліміне жолданды. Рұқсат етілмеген аумақта аң аулағандарды 70 АЕК, яғни 160-170 мың теңге көлемінде айыппұл күтіп тұр. Бұдан бөлек, облыста соңғы 2 айда браконьерлік бағыттағы 17 құқық бұзушылық анықталып отыр» делінген хабарламада.
Еске сала кетейік, Жамбыл облысы аумағында аң атуға тыйым салынған 4 табиғи қорық бар. Оның екеуі - республикалық, қалған екеуі - жергілікті меншікте.
Ғибрат Сембай
