Мүгедек бала тәрбиелеп отырған ана депутаттан көмек сұрады
КӨКШЕТАУ. ҚазАқпарат - Қазақстан Республикасы Парламенті Мәжілісінің депутаты, «Нұр Отан» партиясы фракциясының мүшесі Жанат Омарбекова жұмыс сапарымен Көкшетау қаласында болды, деп хабарлайды «ҚазАқпарат» ХАА тілшісі.
Сапар барысында халық қалаулысы алдымен Көкшетау қаласының Сарыарқа ықшам ауданында салынып жатқан 900 орындық жаңа мектептің құрылысымен танысты. Құрылыс учаскенің басшысы Серік Өсербаевтың айтуына қарағанда, білім ордасын 2018 жылдың үшінші тоқсанында пайдалануға беру жоспарланған. Қазіргі кезде нысанда су, кәріз желілерін орнату жұмыстары аяқталып, жылу және электр желілері тартылуда. Осы күні құрылыста 100-ге тарта адам жұмыс істеуде. Алдағы уақытта олардың санын 200-ге жеткізу көзделуде. Депутат жұмысшылармен жасалған келісімшарттың болуы, оларды сақтандыру, мүгедектерге арналған пандустар, қосымша шығу есіктері, адамдарды жұмысқа жергілікті жерден тарту мәселелеріне қатысты сауалдар қойды.
«Құрылысшылар көбінесе сақтандыру, келісімшарт жасасу мәселелеріне онша көңіл бөле бермейді. Оны жұмыс берушілер де құнттамайды. Азаматтар өз құқықтарын білмейді. Барлық жағдайдың заң шеңберінде болуын жұмыс берушілер қамтамасыз етулері тиіс. Сонда даулы мәселелер болмайды», -деді мəжілісімен өз сөзінде.
Бұдан кейін Жанат Омарбеков Көкшетаудан Краснояр селосы бағытындағы күре жолдың бойында құрылысы тоқтап тұрған мектептің жағдайымен танысты. Бұл нысанның құрылысын толық аяқтау үшін 1 миллиард теңгеге жуық қаржы қажет екен.
Ал, «Нұр Отан» партиясы облыстық филиалының қабылдауында азаматтарды жеке мәселелері бойынша қабылдаған халық қалаулысына келген көкшетаулық тұрғындардың көбі -тұрғын үй кезегі мәселесін көтерді. Мәселен, жасы алпысты алқымдаған Рәшида Қазбекова осы күні денсаулығында психологиялық және неврологиялық ауытқулары бар баласына медициналық қызметтердің толық жасалмайтындығы, дәрі-дәрмектің қымбаттығы, осындай ауыр сырқатқа ұшырағандарға тұрғын үй бөлу кезінде назар аударылмайтындығы туралы айтып, өкпе-ренішін білдірді.
Он жылдан бері пәтер алу кезегінің әлі келмегендігін айтып, халық қалаулысынан көмек сұрады. Барлық жағдайды тыңдаған депутат тиісті мекемелерге тапсырма беріп, өзі де осы мәселені бақылауға алатындығын, заңға мүгедектердің деңгейіне байланысты өзгертулер енгізуге ұсыныстар дайындалатындығын айтып, сендірді.
Сонымен қатар, Мәжіліс депутаты Көкшетаудағы «Тыныс» АҚ, «Новопэк» ЖШС тəрізді ірі өндіріс орындарында болып, еңбек ұжымдарымен кездесті.
