Мүгедектер мен қарттардың ақшасы талан-таражға салынып жатыр - бас прокурор А.Дауылбаев

АСТАНА. 7 қараша. ҚазАқпарат - Бүгінде мүгедектер мен қарттар үйіне түсетін қарияларды күтіп-ұстауға бөлінетін бюджет қаржысы талан-таражға салынып жатыр. Бұл туралы бүгін мүгедектердің құқықтарын қорғау мәселелеріне арналған алқа мәжілісінде ҚР Бас прокуроры Асхат Дауылбаев мәлім етті.

Оның хабарлауынша, ондай оқиғалардың бірі Оңтүстік Қазақстан облысында анықталды. Көксай медициналық-әлеуметтік мекемесі қариялардың зейнетақы жинақ ақшаларын екі жыл бойы жымқырып келген. «Стоматологиялық көмек» ретінде ұрланған ақшаның жалпы көлемі 1 млн. теңгеден асты. «Облыста барлық психоневрологиялық мекемелерде санитарлық және өртке қарсы ережелер сақталмайды», - дейді А.Дауылбаев. Бас прокурор атап көрсеткендей, Екібастұз қаласында мүгедектерге тиесілі гигиеналық заттар төрт есе аз көлемде беріліп келген. Осылайша, бюджет қаржысы талан-таражға салынды.