Мұхамедиұлы «Құрмет» және «Парасат» орденінен, қайраткер атағынан айырылады

АСТАНА. ҚазАқпарат – Ұлттық музейдің бұрынғы директоры Арыстанбек Мұхамедиұлы осыған дейін алған мемлекеттік наградалары мен берілген атақ-дәрежелерін кері қайтарады, деп хабарлайды ҚазАқпарат тілшісі.

«Президентке Арыстанбек Мұхамедиұлына берілген «ҚР Еңбегі сіңген қайраткері» атағы, сонымен қатар «Құрмет» және «Парасат» орденінен айыру туралы ұсыныс берілсін», - деді үкімді оқыған судья Бағлан Ыдырысов.

Ұлттық музейдің бұрынғы басшысы өмір бойы мемлекеттік қызметте еңбек ету құқығынан да айрылды.

Сондай-ақ, үкімде Арыстанбек Мұхамедиұлының дүние-мүлкі тәркіленбейтіні айтылған.

Бұған дейін хабарлағанымыздай, Арыстанбек Мұхамедиұлы 8 жылға сотталды.

«Арыстанбек Мұхамедиұлы ҚР Қылмыстық кодекстің 28-бабы 3-бөлігі және 189-бөлігі 4-тармағы 2-тармағы бойынша құқық бұзушылық жасағаны үшін кінәлі деп танылсын. 8 жылға бас бостандығынан айыру жазасы тағайындалсын», - деді судья Бағлан Ыдырысов.

Одан бөлек, судья Арыстанбек Мұхамедиұлының сыбайластарына да үкім шығарды.