Мұхтар Тілеуберді Швейцария Федералдық Жиналысы Ұлттық Кеңесінің Төрағасымен кездесті
НҰР-СҰЛТАН. ҚазАқпарат - Қазақстан Премьер-Министрінің орынбасары – Сыртқы істер министрі Мұхтар Тілеуберді Қазақстанға ресми сапарымен келген Швейцария Конфедерациясы Федералдық Жиналысы Ұлттық Кеңесінің Төрағасы Андреас Эбимен кездесті, деп хабарлайды ҚазАқпарат ҚР СІМ ресми сайтына сілтеме жасап.
Тараптар COVID-19 пандемиясына қарамастан, Қазақстан мен Швейцария екіжақты күн тәртібінің барлық спектрі бойынша белсенді өзара іс-қимылды жалғастырып жатқанын қанағаттанушылықпен атап өтті. Жоғары деңгейдегі саяси диалог орнатылған: мемлекет басшыларының мамыр айының соңында бейнеконференция форматындағы келіссөздері, ҚР Президенті Қ.Тоқаевтың Швейцарияға ресми сапары жоспарлануда.
Швейцария өкілетті бизнес-делегациясының 2021 жылғы мамырдағы Қазақстанға сапарының қорытындылары және Іскерлік Кеңестің қызметі талқыланды.
Екіжақты ынтымақтастықты нығайтудағы парламенттік дипломатияның маңыздылығы атап өтілді. Тараптар «Қазақстан – Швейцария» парламентаралық ынтымақтастық тобы аясында екі ел парламентшілерінің белсенді өзара іс-қимылын құптады.
Швейцария қазіргі уақытта Қазақстан экономикасының көлемі бойынша үшінші инвестор, онда бүгінде швейцариялық капиталдың қатысуымен 400-ден астам компания жұмыс істейді.
