Мұрат Жұрынов: Сайлау - халықтың пікірі, елдің болашағы
АЛМАТЫ. ҚазАқпарат - Сайлау - халықтың пікірі, елдің болашағы. Бұл ҚР Ұлттық ғылым академиясының президенті, академик Мұрат Жұрыновтың пікірі, деп хабарлайды ҚазАқпарат тілшісі.
«Мен Көктөбе жақта орналасқан сайлау учаскесіне барып, өз даусымды бердім. Ең бастысы, халықтың өмір сүру сапасы жақсарса екен деймін. Жергілікті тұрғындардың бәрі ауыз сумен қамтылып, жағдайы жақсы болатын болса, жаппай интернет жүйесі жақсарып, істейтін жұмысы болса, онда халықтың сайлауға қатысу көрсеткіші жоғары болады. Сайлау деген халықтың мәселесін шешудің алғышарты болуы керек. Осы ретте бүкіл партия ел аралады, сайлауалды бағдарламасымен таныстырды. Енді өздері үгіт жасаған міндеттерін орындауы тиіс»- деді академик.
Оның айтуынша, Ең бастысы, дұрыс таңдау жасап, болашақтан жақсылық күту керек.
«Қазақ елінің жері кең. Әлемде жер көлемі жөнінен 9-шы орындамыз. Бұл Құдайдың бізге берген несібесі. Ата-бабаларымыз осы кең жерді бізге аманат етті. Енді осыны көздің қарашығындай сақтауымыз керек. Қазақтың жеріне көз алартқан арандатушыларға мен өз басым мән бермеймін. Ол мүмкін емес. Олар өз жерлерін игере алмай жатып, халқының жағдайын жақсарта алмай жатып, бізге басын сұға алмайды. «Ит үреді, керуен көшеді». Қазақтың жері бай - мұнай да, газ да бар. Оны өзіміз пайдалансақ, қазақтан бай халық болмайды. Біздің болашағымыз жарқын. Ең бастысы, дұрыс таңдау жасап, болашақтан жақсылық күтуіміз керек. Сайлау – пікірі, елдің болашағы»,- дейді Мұрат Жұрынов.
