Мұздақ көлдерден 3 млн текше метр су бұрылды: сел қаупі сейілді ме
АСТАНА. KAZINFORM — 2026 жылғы сел қаупі кезеңінде жарылу қаупі бар мұздақ көлдерден шамамен 3 млн текше метр су бақыланатын түрде бұрылды, деп хабарлайды Төтенше жағдайлар министрлігінің баспасөз қызметі.
ҚР ТЖМ халық пен инфрақұрылым нысандарын сел қаупінен қорғауға бағытталған алдын алу шаралары кешенін жүргізіп жатыр. Тәулік бойы 15 аса қауіпті көлге бақылау жүргізілді. Су деңгейін реттеу үшін мамандар шамамен 50 сифон құбырын орнатты. Су көлемі белгіленген қауіпсіз деңгейге дейін төмендегеннен кейін сифондардың басым бөлігінің жұмысы тоқтатылды. Қазіргі уақытта № 9 Ақсай және № 19 Талғар көлдерінде су бұру жұмыстары жалғасып жатыр.
9 қыркүйекте ТЖМ «Қазселденқорғау» ММ қызметкерлері ғалымдар және бейінді мамандармен бірлесіп, Іле Алатауының солтүстік беткейінде Ұзынқарғалы өзені бассейнінен Түрген өзеніне дейінгі аумақта әуеден визуалды тексеру жүргізді.
— Тексеру нәтижесінде таулы аймақтардағы сел жағдайы тұрақты екені анықталды. Мұздақ көлдердің басым бөлігінде су деңгейінің маусымдық төмендеуі байқалады. Мұздықтардан келетін еріген су ағыны айтарлықтай азайған. Мұздық процестерінің белсенділігі мен сел қаупінің жоғарылау белгілері анықталған жоқ. Ықтимал қауіпті учаскелер тәулік бойы бақылауда. Бұл үшін автоматтандырылған жүйелер, бейнебақылау және гидрометеорологиялық датчиктер қолданылады. Мамандар 852 жерүсті тексеру жүргізді. Әуеден тағы 17 тексеру орындалды. Жұмыс сел қаупі кезеңі аяқталғанға дейін жалғасады, — делінген хабарламада.
Қазақстанның ТЖМ сел қаупі туралы ескерту алған жағдайда шұғыл қызметтердің нұсқауларын қатаң сақтау, өзен арналары мен тау шатқалдарына жақындамау, сондай-ақ эвакуациялаудың қауіпсіз бағытын алдын ала анықтау қажеттігін ескертеді.
Бұған дейін Алматыда сел қаупінің алдын алу мақсатында мұздақ көлдердің жай-күйін тәулік бойы бақылайтын бес биік таулы маусымдық бақылау бекеті жұмысын бастағанын жазғанбыз.
