Мьянмадағы жер сілкінісінен қаза тапқандар саны 2 800-ден асты

АСТАНА. KAZINFORM – 2 сәуірдегі мәлімет бойынша, Мьянмадағы жер сілкінісінен 2 800-ден астам адам көз жұмды. Бұл туралы Қытайдың орталық телеарнасы хабар таратты, деп  хабарлайды Kazinform тілшісі.

Кейінгі келіп жеткен мәліметтер бойынша, Мьянмадағы күшті жер сілкінісінен қаза тапқандар саны 2 886-ға жеткен. 4 639 адам жараланып, 373 адам хабар-ошарсыз кеткен. Елде іздестіру және құтқару жұмыстары жалғасып жатыр. 

2 сәуірдегі жағдай бойынша, Мьянманың орталығында барлығы 54 афтер сілкініс тіркелді. Ең жоғары магнитуда – 7,5, ең төменгісі – 2,8 балл.

Еске салсақ, 28 наурызда Мьянмада 7,9 балдық жер сілкінісі тіркелгені хабарланды.

Жер сілкінісінен зардап шеккен өңірлерде төтенше жағдай жарияланғаны белгілі болды.

Сол күні жер сілкінісі 50-ден астам адамның өмірін қиғаны анықталды. Алайда кешке қаза тапқандар саны 144-ке жетті.

Кейіннен Мемлекет басшысы Мьянма Премьер-министрі Мин Аун Хлайнға көңіл айту жеделхатын жолдады.

Бұдан бөлек, Мьянма премьер-министрі бір апталық ұлттық аза тұту жариялағаны мәлім болды.

Сонымен қатар Мьянмадағы жер сілкінісінің болжалды себебі аталды.