Мысырда 150-ге жуық қазақстандық бар, олардың 120-сы Каирде - ҚР СІМ
АСТАНА. 19 тамыз. ҚазАқпарат - Жаппай тәртіпсіздік пен қарулы қақтығыстар болып жатқан Мысыр елінде қазіргі таңда 150-дей қазақстандықтар жүр. Олардың негізгі бөлігі студенттер. Бұл туралы бүгін ҚР Сыртқы істер министрлігінің баспасөз хатшысы Нұржан Айтмаханов мәлімдеді.
«Біз Мысырда болып жатқан оқиғаларға алаңдаулымыз. Қазақстанның елшілігі сондағы азаматтармен үнемі байланысып отырады. Жалпы консулдық тіркеуде 500-ге тарта адам бар, дәл қазір Мысырда 150 қазақстандық бар, ал олардың 136-сы студент. Негізгі оқиғалар орын алып жатқан Каир қаласында 120 адам тұрып жатыр», - деді Н. Айтмаханов.
Оның айтуынша, Мысырдағы Қазақстан елшілігі жағдайды бақылап, еліміздің азаматтарымен қарым-қатынас орнатып, оларға түсіндіру жұмыстарын жүргізіп, көп адам шоғырланған жерлерге жоламауға кеңес беріп отырады.
«Егер керек болған жағдайда біздің азаматтарымызға көмек көрсету үшін барлық жағдайлар жасалады», - деді ҚР СІМ өкілі.
