Н. Назарбаев: Былтырдың өзінде мемлекеттік органдарға халықтан 22 млн. хат келіп түскен
АСТАНА. 17 қазан. ҚазАқпарат - Былтырдың өзінде ел азаматтары мемлекеттік органдарға 22 млн. хат түсірді. Бүгін Астанадағы «Қазмедиа» орталығында «А» басқарушы корпусы мемлекеттік қызметшілерімен кеңес өткізген Елбасы Нұрсұлтан Назарбаев осылай мәлім етті.
«Соңғы 3 жылдағы зерттеулер мемлекеттік органдарда бірқатар кемшіліктердің орын алғанын көрсетіп отыр. Бұлар: қызмет сапасының төмендігі, қызметтердің, жұмыс уақытының жүйесіздігі, өте үлкен қағазбастылық. Тек былтырдың өзінде ғана ел азаматтары мемлекеттік органдарға 22 млн. хат түсірді. Халқымыздың саны 17 млн. ал келіп түскен хат 22 млн. болып отыр. Мемлекеттік бағдарламаны іске асыру 80 пайыз, ал бюджет қаржысының игерілуі 98 пайыз. Айырмашылық қандай?», - деді Н. Назарбаев.
Осыған орай, Елбасы бұндай олқылықты жою жаңа корпустың да міндеті екенін атап өтті. «А» корпусы мемлекеттік басқарудың, қаражатты игерудің тиімді жолдарын іздеуі керек», - деді Н. Назарбаев.
