Н. Нығматулин: Жаңартылған энергия көздерін пайдалану - инновациялық технологияларды дамытуға жасалған қадам

АСТАНА. 8 мамыр. ҚазАқпарат - Бүгін Мәжілістің жалпы отырысында депутаттар Қазақстан Республикасының кейбір заңнамалық актілеріне жаңартылатын энергия көздерін пайдалануды қолдау мәселелері бойынша өзгерістер мен толықтырулар енгізу туралы» Қазақстан Республикасы Заңының жобасын бірінші оқылымда қарады.

Талқылау барысында Палата төрағасы Нұрлан Нығматулин бұл заң жобасының елімізді одан әрі экономикалық және технологиялық жаңғырту жолында өте маңызды және қажет екенін атап өтті.

«Біз табиғаттың байлығын тиімді пайдалана білуіміз керек. Бүгінгі күні желдің күшін, күннің сәулесін, судың қуатын қолдану - экологиялық проблемаларды шешуге, энергияны сақтауға, инновациялық технологияларды дамытуға жасалған қадам», - деді спикер.