Н.Тінәлиев екі мәрте Азия чемпионы атанды
АСТАНА. ҚазАқпарат - Қазақстандық палуан Нұрмахан Тінәлиев грек-рим күресінен Доха қаласында өткен Азия чемпионатының жеңімпазы атанды.
Vesti.kz сайтынан алынған мәліметке қарағанда, 27 жастағы Нұрмахан 130 келіге дейінгі салмақта финалда қытайлық Киан Менді 3:2 есебімен ұтты.
Н.Тінәлиев осымен екінші рет Азия чемпионы атанып отыр. Бұдан бір жыл бұрын ол Нью-Делиде 120 келіге дейінгі салмақта үздік шыққан болатын. Оған қоса Н.Тінәлиевтің әлем біріншілігінің үш мәрте қола жүлдегері екенін айта кетейік. Жетпей тұрғаны - олимпиада жүлдесі ғана.
Биылғы Азия біріншілігінде сонымен қатар Нұрсұлтан Тұрсынов (85 кг) күміс, Марғұлан Әсембаев (98 кг), Жасұлан Қошанов (80 кг), Демеу Жадыраев (66 кг) қола жүлдені еншіледі.
