Нақтыланған бюджет - даму һәм индустриялық-инновациялық өрлеу бюджеті болып табылады - Ө. Шөкеев
аурыздың 9-ы. ҚазАқпарат /Қанат Мәметқазыұлы/ - Ағымдағы жылдың нақтыланған бюджеті - даму һәм индустриялық-инновациялық өрлеу бюджеті болып табылады. Бүгін ҚР Парламенті Сенатында өткен «Өңір» депутаттық тобының отырысы барысында ҚР Премьер-Министрінің бірінші орынбасары Өмірзақ Шөкеев осылай мәлім етті,
деп хабарлайды ҚазАқпарат.
«Мемлекет басшысының ағымдағы жылға қатысты алға қойған барлық тапсырмаларын жүзеге асыру мақсатында біз іс-әрекеттерімізді қаржылық қамтамасыз етуді толық шештік және нақтыланған бюджетті Парламентке ұсындық. Бюджетті нақтылаудың базалық қағидаты бірқатар мәселені қамтиды. Атап айтқанда, біз ең алдымен даму бюджетін һәм индустриялық-инновациялық өрлеу бюджетін ұсынып отырмыз. Сонымен бір мезгілде, Елбасының белгілеген мезгілінде 2010-2014 жылдарға арналған үдемелі индустриялық-инновациялық бағдарламасына түзетулер енгізіліп отыр. Бұл алдағы бес жыл бойғы Үкіметтің ең басты құжаттарының бірі болып қала береді», деді Ө. Шөкеев. Оның айтуынша, бағдарламаға сәйкес, қолданыстағы 50-ден астам бұрынғы бағдарламалар күшін жоятын болады. Бұл ретте үдемелі индустриялық-инновациялық даму бағдарламасы негізгі мақсаттарға қол жеткізу үшін нақты тетіктерді қамтиды. Бағдарлама бойынша нақты сыртқы және ішкі ресурстар есебінен инвестициялық қамтылымдар күтіледі.
«Ағымдағы жылы 146 жобаны жүзеге асыру аяқталады және жаңа 47 жоба қолға алынады деп күтілуде. Тоқтала кететін жайт, енді қолға алынатын және қолданыстағы барлық жобаларға қатаң мониторинг жүргізіледі. Біз ешқандай да жобаның қадағалаусыз қалмайтындай жұмыс үдерісін қалыптастыратын боламыз», деді Үкімет басшысының орынбасары.
