NASA Starliner басқаратын ғарыш кемесінің алғашқы ұшырылымын кейінге қалдырды
АСТАНА. KAZINFORM – Ұшырылымға екі сағат қалғанда АҚШ-тың Ұлттық аэронавтика және ғарыш басқармасы (NASA) Boeing компаниясының Starliner басқаратын ғарыш кемесінің Халықаралық ғарыш станциясына (ХҒС) алғашқы ұшырудан бас тартты, деп хабарлайды DW ақпарат агенттігі.
Дүниежүзілік БАҚ-тың 7 мамыр, сейсенбі күні таңертең хабарлағанындай, бұған Starliner-ді орбитаға шығаруы тиіс United Launch Alliance (ULA) өндірген Atlas-V зымыран тасығышының оттегі шығару клапанындағы ақау себеп болған.
Starliner басқарылатын ғарыш кемесі 6 мамырда Канаверал мүйісіндегі ғарыш айлағынан жергілікті уақыт бойынша сағат 22:34-те ұшырылады деп жоспарланған болатын. NASA астронавтары Бэрри «Бутч» Уилмор мен Сунита Уильямс Жерге оралмас бұрын ХҒС-та шамамен бір апта болады деп болжанған.
NASA басшысы Билл Нельсонның X әлеуметтік желісінде ұшырудан бас тарту туралы түсініктеме бергенінде оның басты басымдығы ғарышкерлердің қауіпсіздігі екенін айтты.
«Біз дайын болған кезде ұшырамыз», - деп қосты ол нақты күнді атамай.
«Сізге зымыран қажет болса, бізге хабарлаңыз», - деп жазды SpaceX негізін қалаушы Илон Маск.
Boeing SpaceX-пен бірге NASA-ның Commercial Crew Program бағдарламасына қатысады. Оның мақсаты – ғарышкерлерді ғарышқа жеткізу. Boeing NASA келісімшарты бойынша экипаж капсуласын әзірлеу үшін 5 млрд доллардан астам, ал SpaceX 3,1 млрд доллар қаражат алды. SpaceX астронавттарды Crew Dragon кемелерімен тасымалдау бойынша бірнеше миссияны орындады.
