Наубайханашы демалыссыз жұмыс жасағаны үшін сотқа тартылды
АСТАНА. ҚазАқпарат - Франциядағы «Үздік нан - 2014» титулының жеңімпазы Стефан Казнав тынымсыз жұмыс жасағаны үшін айыпты деп танылып отыр. Оның нан дүкені аптасына 7 күн бойы жұмыс жасайды, ал бұған Франция заңында тыйым салынған.
«Еңбек инспекторы екі рет келіп мені тергеп кетті, тіпті полиция да сұрақтың астына алды. Енді мені сот күтіп тұр», - деді наубайханашы.
Сот Казнавқа аптасына 6 күн жұмыс істеу туралы шешім шығарды, енді оның наубайханасы дүйсенбі сайын жабық болады. Оның айтуына қарағанда, ол 250 мың еуро шығынға батады, сондай-ақ бірнеше қызметкерлерді жұмыстан шығаруға мәжбүр болып отыр. «Мен қатты таңғалдым, бірақ бұл заң, одан аса алмаймыз», - деп күйінді ол.
Айта кетейік, Францияда аптасына 7 күн жұмыс істеуге тек белгілі бір мекемелерге (қонақүй, өрт сөндіру қызметі, БАҚ) ғана рұқсат беру туралы заң ғасырдан астам уақыт бұрын қабылданған болатын.
