Назарбаев тек отандық қол сағатты тағатын болды
АСТАНА. ҚазАқпарат - Тәуелсіздік құрдасы Арман Тосқанбаев "Отан" брендімен жасаған сағатын Елбасы Нұрсұлтан Назарбаевқа сыйға тартты, деп хабарлайды ҚазАқпарат.
"Мен - жас кәсіпкермін. Қазір 25 жастамын және 4 компаниям бар. Оның біреуінің өзі жылына 168 млн. теңге табыс табады, 33 жұмыс орнын қамтамасыз етіп отыр. "Отан" брендімен сағат жасайтын кәсіпорным "Қазақстанда жасалған" жобасын іске асыруға үлес қосуда. Сіздің тапсырмаңызбен жүзеге асырылып жатқан "Бизнестің жол картасы-2020" бағдарламасының арқасында біздің кәсіпорын зор серпін алды. Сол себепті Сізге зор алғыс айта отырып, Сізге арнап жасаған қол сағатты сыйға тартпақпыз", - деді жас кәсіпкер Тәуелсіздік сарайында Республикалық жастар форумында.
Форум барысында А. Тосқанбаев Президенттің қолына сағатты өзі тағып берді.
"Енді тек өзіміздің отандық сағаттарды ғана тағамыз, швейцариялықты тақпаймыз",-деді Н. Назарбаев.
Естеріңізге сала кетейік, биыл қыркүйек айында Тәуелсіздік құрдасы Арман Тосқанбаевпен "ҚазАқпарат" тілшісінің сұхбаты жарияланған еді.
