Назым Қызайбай: Келесі айқастарымда бұдан да жақсы жұдырықтасамын

ПАРИЖ. KAZINFORM — Парижде өтіп жатқан Жазғы Олимпиада ойындарында алғашқы жекпе-жегінде жеңіске жеткен Назым Қызайбай алғашқы әсерімен бөлісті.

«Бірінші жекпе-жек болғаннан кейін шығар, кішкене қиындау болды. Енді келесі айқастарымда бұдан да жақсы жұдырықтасуға тырысамын. Олимпиаданың атмосферасы өте керемет. Адамдар да өте көп, жалпы өзіме ұнап жатыр. Жекпе-жектің басында бапкерлерімді кішкене алаңдатып жібергендей болдым. Алайда, ең бастысы қарсыласымды ұттым. Қарсыластарымның барлығы мықты. Сол үшін алдағы айқастарыма барынша тыңғылықты дайындалып шығамын», - деді Назым Қызайбай.

Айта кетейік, Назым Италия боксшысы Джордана Соррентиноны жарыс жолынан тайдырды.