Неліктен сырттан пилоттар тартылып жатыр
АСТАНА. KAZINFORM — Қазақстанда авиация саласында пилот тапшылығы байқалады. Бұл туралы Көлік министрі Нұрлан Сауранбаев Үкіметтегі брифингте айтты.
Министрдің айтуынша, елдегі авиация саласында 23 мың адам еңбек етеді. Жыл сайын салаға шамамен 500 маман қажет болады. Әсіресе пилоттарды даярлауда халықаралық сертификат алу мәселесі маңызды болып отыр.
— Бізде Азаматтық авиация академиясы бар, сол жерде сертификатталған мамандар даярланады. Оған қоса, келер жылдың қыркүйегіне дейін өзіміз сертификат беретін орталық ашамыз. Сонда авиация мамандарын екі жерде дайындаймыз, — деді Нұрлан Сауранбаев.
Тілшілер сұрағына жауап берген министр қазақстандық мамандардың жаппай шетелге кетпегенін, керісінше, елде пилот жетіспегей, шетелдік мамандар тартылып жатқанын жеткізді.
— Қазір «Эйр Астанадағы» пилоттардың 40 пайызы немесе шамамен 300 адам — шетелдік мамандар. Егер елде жеткілікті деңгейде даярласақ, өз мамандарымызды алар едік, — деді министр.
Айта кетейік, Алматыдағы Азаматтық авиация академиясына бөлінетін грант саны жылдан-жылға артып келеді. Түлектерді жұмысқа орналастыру көрсеткіші де 90% жеткен.
Сондай-ақ, Қазақстанда Авиациялық ғылыми-зерттеу институты құрылады.
