Neo Nomad Visa алуға өтініш берушілерге қандай талап қойылады

виза
Фото: Kazinform

АСТАНА. KAZINFORM – Туризм және спорт министрлігі Neo Nomad Visa алуға өтініш берушілерге қандай талап қойылатынын айтты. 

«Бүгінгі күні Neo Nomad Visa енгізу жоспарлануда. Ол үшін министрлік мүдделі мемлекеттік органдармен бірлесіп, іске асыру тетіктерін және қажетті құжаттарын пысықтап жатыр. Бұл визаның иегері табысы кемінде 3 мың АҚШ долларын құрайтын ТОП-50 дамыған елдің азаматтары (елдердің тізбесі нақтылануы мүмкін), сондай-ақ соттылығы жоқ, Қазақстан аумағында жалға алынған жылжымайтын мүлік және жарамды медициналық сақтандыруы бар тұлғалар бола алады. Визаның қолданылу мерзімін тағы бір жылға ұзарту мүмкіндігі беріледі», - деп атап өтті министрліктен агенттіктің ресми сауалына орай.

Ведомствоның мәліметінше, аталған визаны алуға өтініш берушілерге мынадай негізгі талаптар (тізім әлі нақтыланады) қойылмақ: 

– 23 жастан асқан (өзгертілуі мүмкін);

– соттылықтың болмауы; 

– шетелден 3 мың доллардан кем емес заңды табысының болуы. 

– Қазақстан аумағында жалға алынған жылжымайтын мүлкінің болуы; 

– медициналық сақтандырудың болуы. 

Айта кетейік, Туризм және спорт министрі Ермек Маржықпаев қазіргі заманғы көшпенділердің визасын енгізу мәселесі қаралып жатқанын айтқан болатын.

Соңғы жаңалықтар