Непалда орман өрті өршіп тұр

АСТАНА. KAZINFORM – Непалдың орталық бөлігін шарпыған орман өрті ауылдардың инфрақұрылымына қауіп төндіреді. Кей жерлерде мал қоралары қызыл жалынға оранып, құрал-жабдықтар мен су құбырларына зақым келген, деп жазады Euronews.

Өрттен ең көп зардап шеккен Дхадинг ауданыында орналасқан ормандар төрт күн қатарынан өртеніп жатыр. Қызыл жалын елді мекендерге жақындап, жергілікті тұрғындарды алаңдатып отыр.

Күннің ысуына байланысты жаңа өрт ошағы әсіресе Нилканта муниципалитетінде пайда болды. Кей жерлерде өрт су құбырларын зақымдап, мал қораларын, отын қорын қиратты. Зардап шеккен елді мекендерде адамдар орман шаруашылығы басқармасын өртке дұрыс жауап бермегені үшін сынға алады.

Синхулиде алаңдатарлық жағдай қалыптасты. BP тас жолының екі жағында да өртеніп жатқан  орман өрті саяхатшыларға қауіп төндірді, өйткені жалын Банепа-Синдхули-Бардибас бағытының бойындағы қарағай ағаштарға ауыз салған. 

Бұған дейін хабарланғандай, Непалда соңғы бір айда өрт салдарынан 22 адам қаза тапты.