Непалдағы су тасқыны мен көшкін салдарынан 33 адам мерт болды
КАТМАНДУ. ҚазАқпарат – Непалдың батысында су тасқыны мен көшкін салдарынан өткен аптада 33 адам қаза тапты, деп хабарлайды ҚазАқпарат BBC News-ке сілтеме жасап.
Биліктің хабарлауынша, елдің солтүстік-батысындағы Карнали провинциясына муссондық жаңбыр жауды, онда мыңдаған тұрғын эвакуацияланды. Жүздеген үй қар көшкіні мен су тасқынынан зардап шекті. Провинция бойынша 22 адам хабар-ошарсыз кеткен, тағы ондаған адам жарақат алды.
Құтқару қызметтерінің хабарлауынша, елдің таулы жері жұмысты қиындатып отыр. Кейбір аудандарда Карнали өзенінің деңгейі 12 метрден асып кетті. Өзен арқылы өтетін бірнеше аспалы көпірді су шайып кеткен.
Ел билігі апатты аймақтарға тікұшақпен көмек жіберіп жатыр. БҰҰ-ның гуманитарлық мәселелерді үйлестіру басқармасы азық-түлік пен дәрі-дәрмектерді елдің батысындағы көп зардап шеккен қауымдастықтарға тарататынын хабарлады.
Непалда муссон маусымы аяқталуға жақындап қалды, ол әдетте маусым айында басталып, қазан айында аяқталады.
Ұлттық төтенше жағдайлар жөніндегі жедел орталықтың мәліметі бойынша, биыл жаңбыр салдарынан болған табиғи апаттар кем дегенде 110 адамның өмірін қиды.
Рустем Кожыбаев
Фото: UNICEF
