Ниццадағы теракт кезінде жоғалған сегіз айлық бала Facebook арқылы табылды
БРЮССЕЛЬ. ҚазАқпарат - Ниццада ұйымдастырылған лаңкестік оқиғадағы абыр-сабырда жоғалған сегіз айлық сәбиді Facebook желісінің қолданушылары тауып берді.
Тобыр арасында сәбиінен көз жазып қалған Тиава Баннер (Tiava Banner) әлеуметтік желі қолданушыларынан көмек сұраған.
«Біз 8 айлық сәбиімізді жоғалтып алдық. Ниццадағы достар, егер сәбиді көрген болсаңыздар, тауып алсаңыздар, маған хабарласыңыздаршы», - деп жазған Тиава Facebook парақшасына.
Оған бейжай қарамаған желі қолданушылары баланы тауып берді.
«Facebook-ке рақмет, бізге қол ұшын созған, қолдау білдіріп хабарлама жазған адамдарға рақмет!» - деп бақытты ана жаңа пост жазған.
Сол мезетте жергілікті "Nice-Matin" (Ницца таңы) басылымы бейсенбі күні кешке 54 баланың қалалық ауруханаға жеткізілгенін хабарлады.
