Нигерияда қарулы топ колледжге шабуыл жасап, жүздеген адамды ұрлап әкеткен
ПРЕТОРИЯ. ҚазАқпарат – Нигерияның батысындағы Кагара қаласында қарулы топ мемлекеттік колледжге шабуыл жасап, жүздеген студент пен оқытушыларды ұрлап әкеткен, деп хабарлайды ҚазАқпарат Agence France-Presse (AFP) агенттігіне сілтеме жасап.
«Қарулы топ жүздеген студент пен оқытушыларды алып кетті. Бірнеше студент пен бір қызметкер қашып үлгерген», дейді жергілікті шенеуніктердің бірі.
Сондай-ақ нигериялық Vanguard газеті жергілікті билік өкілдеріне сілтеме жасап шабуыл кезінде бір студент мерт болғанын және бірнешеуі жарақат алғанын хабарлады. Шенеуніктің сөзінше, студенттік форма киген қарулы адамдар түнгі 2-де жатақханаға басып кірген. Ұрланған адамдардың нақты саны анықталып жатыр.
